Hugsaðu áður en þú kýst

BRÁTT verður kosið um stækkun álvers í Hafnarfirði. Hér ætla ég að fá lesendur til að hugsa um nokkur atriði áður en gengið verður til kosninga.

Við upphaf kosningabaráttu Alcan var mengunaraukningu haldið frá umræðunni um álverið. Sumir héldu því jafnvel fram að mengun ykist ekki neitt. Annað kom á daginn.

Samkvæmt Hagstofu Íslands nam koltvísýringsútblástur vegasamgangna á Íslandi árið 2004 636.000 tonnum. Eftir stækkun mun losun álversins, skv. minnisblaði Alcan, nema 727.720 tonnum á ári. Útblástur álvers í Hafnarfirði verður meiri en útblástur allra vegasamgangna Íslendinga. Þá er ótalin aukin svifryksmengun, flúoríðsmengun, brennisteinsmengun og svo sjónmengun, auk háspennulína sem leggja þarf um eða yfir bæinn.

Það var einnig látið í veðri vaka að Alcan myndi leggja niður álbræðsluna í Straumsvík yrði ekki kosið Alcan í vil. Þetta stangaðist á við fyrri orð forsvarsmanna Alcan, og fæstir vilja í dag kannast við að hafa haldið þessu fram. Álverið er í stórum plús og fær raforku á hlægilega lágu verði. Alcan hefur enga áætlun um undanhald í Straumsvík. Sumir vilja helst að fyrirtækið fari samt, aðrir vilja frekar halda því í Hafnarfirði. Sums staðar er þó afstaðan eindregnari.

Súrálið sem brætt er í Straumsvík er unnið úr báxíti. Báxítið er numið í grunnum og stórum námum í, svo dæmi sé tekið, Jamaica. Þegar báxíti er breytt í súrál verður til "rauð drulla", bráðskaðleg efnablanda. Fyrir hvert tonn af súráli verða til 3–4 tonn af þessari rauðu drullu. Þessi drulla er ekkert verðmæti í augum Alcan (né nokkurs manns) og er því veitt í fljót og vötn og hefur valdið miklum skaða á grunnvatni innfæddra, sem og lungnasjúkdómum, blindu, mígreni, hjartasjúkdómum og krabbameini. Dæmi eru um fólk sem hefur þurrt og gatað skinn, misst tennur og fengið hárlos. Fjármagn skortir til lyfja og lækninga. Að sjálfsögðu er þetta langt í burtu, en eitt er vert umhugsunar. Þótt við getum flest glaðst yfir því að vera ekki blind, með krabbamein eða hjartasjúkdóma, er vert að hugleiða hvað slíkt fyrirtæki er reiðubúið að gera fyrir hagsmuni okkar og hvað við erum reiðubúin að gera fyrir þetta fyrirtæki.

Lifið heil.

Höfundur er búsettur við bakka Þjórsár.

Athugasemdir

[Guðmundur Ragnar Björnsson, 30.3.2007 kl. 18:01]

Hugsaðu áður en þú skrifar.

Það hefur aldrei verið talað um að heildarmengun minnki. Það sem hefur verið talað um er að mengun á framleitt tonn. Mengun er enganveginn vandamál hjá Alcan í Straumsvík sem er eitt það álver í heiminum sem mengar allra minnst og svifryksmengun er hverfandi miðað við svifryksmengun frá bílaumferð. Ég hef hvergi séð það að afstaða talsmanna Alcan til lokunar hafi breyst að undanförnu. Þeir hafa allan tímann sagt að raforkusamningur álversins sé til 7 ára til viðbótar og allt sé óljóst eftir það og allt eins líklegt að álverinu verði lokað. Fyrir óinnvígða þá er þetta ekki í fyrsta skipti semálverið er nærri lokun því á fyrstu fimmtán árum álversins gekk reksturinn oft illa og lá oft við að Alusuisse menn gæfust upp.

Súrálið sem kemur til Straumsvíkur kemur að langstærstum hluta frá Írlandi þar sem heilbrigðismál eru að því að ég best veit í góðu lagi og umhverfisreglugerðir í takt við það sem best gerist. Ég veit að það kemur fólki í opna skjöldu að heyra að fyrirheitna landið Írland sé með iðnað og það súralsvinnslu en svona er nú það. Afgangurinn kemur síðan frá Bandaríkjunum. Eflaust er hægt að finna dæmi um slæmann frágang á rauðri drullu en á tiltölulega einfaldan hátt er hægt að gera hana óskaðlega.

Lifðu heill