Með mykju á mjóbakinu

Leiðinlegt að sjá hvað fólk finnst það þurfa að gera til að fá athygli, og nokkra aura. Það er þó ágætt að einhverjir standi á rétti sínum, og sem afleiðing af því sjáum við vikulega fréttaburði af töpuðum dómsmálum 365 miðla. Þeir mega skammast sín. Á forsíðu visir.is í dag mátti sjá nokkrar fyrirsagnir af tíðindum dagsins, slitum fyrrum borgarstjórnar og samtvinnun nýrrar, þar sem reynt var að snúa öllu í persónubundnar átakasögur.

"Leitun að spilltari og siðlausari stjórnmálamanni en Birni Inga"
"Björn Ingi kom fram af óheilindum"
"Dapurleg og vond tíðindi fyrir Reykjavík"

Og að lokum ein sem er ekki tilvitnun, heldur fyrirsögn greinar sem enginn hefur lagt nafn sitt við:

"Svona sneri Björn Ingi á sjálfstæðismenn"

Fyrirsagnir á visir.is segja meira en þúsund réttarhöld.

365 miðlar dæmdir til að greiða miskabætur vegna frétta í DV

Hundurinn grafinn í kúnni

Það er út af þessu sem íslam á í stríði við hinn vestræna heim. Þeirra gildi samrýmast ekki okkar athöfnum (sem við framkvæmum með tilliti til eigin gilda) og því vilja þeir refsa okkur eftir þeirra löggjöf. Þá er bara spurningin, hvað eigum við að gera til að benda þeim á sjálfstæði okkar, tjáningarfrelsi og hlutleysi frá öðrum trúarbrögðum?

Teikna mynd af spámanninum þeirra? 

Hótar að hálshöggva Britney og Madonnu

Fyrsta skiptið?

Ég er alveg viss um að þetta er ekki "í fyrsta skipti sem þeir Plant, Jimmy Page og John Paul Jones koma saman á sviði."

Led Zeppelin kemur fram á tónleikum

Google W.A. skráir persónuupplýsingar

Þeir sem fylgjast vel með útgáfu Google á forritum hafa heyrt um og jafnvel sett upp Google Web Accelerator, sem vistar síður sem þú heimsækir svo þær verði sóttar hraðar næst þegar þú heimsækir þær. Það væri allt í lagi, ef Google hefði ekki nýlega verið gagnrýnt harðlega vegna söfnunar á persónuupplýsingum: og viti menn, þegar þú setur upp Web Accelerator kemur fram eftirfarandi:

Google Web Accelerator sends requests for web pages, except for secure web pages (HTTPS), to Google, which logs these requests.  Some web pages may embed personal information in these page requests.

Í stuttu máli sagt: þegar þú ferð á einhverja síðu með Google Web Accelerator uppsettan er hún skráð ásamt persónuupplýsingum sem kynnu að vera sendar með henni, hjá Google.

Fyrsta hæð?

Mig rennir í grun um að hér sé átt við hina erlendu "fyrstu hæð", en í útlöndum er hin íslenska "fyrsta hæð" kölluð "jarðhæð". Bara svo það fari ekki á milli mála.

Bassaleikari Supergrass gekk út um glugga í svefni

Venjulegar uppsagnir

Þetta minnir mig á kosti "lágmarkskaupsins", þar sem hver borgari fær kaup frá ríkinu, og vinnuveitendur þyrftu að greiða lægri laun til launþeganna, framleiðslukostnaður vöru yrði lægri en virðisaukaskattur hærri, svo ríkið fengi fjármagn til að greiða borgurunum laun. Það eina sem myndi breytast fyrir hinn almenna borgara væri síður stressandi vinnuumhverfi, þar sem hætta á brottrekstri myndi minnka og óþægindi við það sömuleiðis. Kerfið ynni á kapítalisma og myndi bæta aðstöðu starfsmanna til muna. Um módel Götz Werner má lesa hér (á þýsku) en um hið almenna módel mér lesa hér (á ensku).

Vonbrigði að verkefnastaða sé ekki betri

Útlendingavæðing?

Mér kæmi það ekki á óvart ef erlendir flugmenn væru enn við vinnu hjá Icelandair. Til hvers að hafa (nánast) ekkert atvinnuleysi á Íslandi ef útlendingar eru ráðnir í störfin í staðinn? Hver á að manna öll álverin sem er verið eða á að smíða?

Icelandair segir upp tugum flugmanna og flugfreyja

Vekur spurningar

Fyrir utan hina augljósu "klukkan á morgun" villu í þessari frétt er hún einnig áhugaverð að því leitinu til að tilefni mútugreiðslunnar var einungis próf á bát. Ef þeir múta fyrir það, hvað annað múta þeir stjórnmálamönnum fyrir? Við vitum að í Bandaríkjunum er þetta svipað, alþingismenn og ráðherrar sitja í stjórnum fyrirtækja, sem fyrir einhverja undarlega tilviljun fá mikinn fjölda lagasetninga sér í hag, og sé lykilþingmaðurinn ekki beintengdur fyrirtækinu má alltaf borga honum fyrir að vera vinur þess.
Er þetta svona á Íslandi líka?
Forstjóri Landsvirkjunar var allt til 1999 í lykilstöðu í Sjálfstæðisflokknum, og hafði verið lengi. Í vor, örstuttu fyrir kosningar, gaf Sjálfstæðisflokkurinn Landsvirkjun vatnsréttindi við Þjórsá, sem ríkið hafði keypt af Fossafélaginu Títan 80 árum áður, án þess að bera það undir Alþingi.
Eru virkjanirnar í Þjórsá, sem Sjálfstæðisflokkurinn styður svo dyggilega (en hljóðlega), nokkuð annað en vinagreiði?

Røkke á bak við lás og slá

Hvernig?

Hvernig gat þetta mögulega gerst?

Í fyrsta lagi þykir mér ótrúlegt að vagninn hafi sveiflast svo mikið að hann hafi hreinlega slengst utan í hinn svo að hurðin opnaðist og fjölskyldan datt út. Og jafnvel þótt það hefði gerst þá eru hurðir á parísarhjólsvögnum (eða -klefum eins og ætti að kalla þá, þar sem vagnar eru á hjólum) á hliðum þeirra, sem er eðlilegt ef maður veltir fyrir sér hvernig fólk gengur í þá og úr þeim. Af myndinni sem með fréttinni fylgir má þó draga þá ályktun að báðar þessar einkar ólíklegu aðstæður hafi átt sér stað á sama tíma, hversu vitlaust sem það kann að hljóma.

Það er einmitt í svona fréttum þegar mér finnst vanta smáatriðin. Hvernig þeir "rákust saman" er að mínu mati vafið meiri dulúð en sú staðreynd að þeir sem í vagninum voru hafi dáið við það að detta úr honum.

Svo má einnig benda á að hvergi er tekið fram að fjölskyldan hafi verið öðrum vagnanna sem lentu í árekstrinum.

Fimm létust er þeir féllu úr parísarhjóli í S-Kóreu

Er hægt að gera mig að stjörnu?

Það sem fram kemur í þessari frétt er lýsandi dæmi um markaðinn í dag. Simon "hætti við að gera hana að söngstjörnu". Er það þá ekki þannig að fólk ráði hvað það hlustar á? Ákveður Simon Cowell hvað mér finnst skemmtilegt?

Miðlar á við FM957 eru þekktir fyrir "playlista", þar sem um 40 lög eru sett á lista og spiluð daginn inn og daginn út. Að hlusta á slíkar útvarpsstöðvar er það sem mér finnst jaðra við heilaþvott, þar sem enginn ákveður hvað hann hlustar á, dagskrárstjóri útvarpsstöðvarinnar ræður hvað er "inni" og hvað "úti" og ákvarðar þannig hvaða tónlist hlustendur mega heyra. Ef vald Simon Cowell er svo mikið að hann geti ráðið vinsældum og smekk fólks lifum við í meiri forræðishyggju en mig hefði nokkurn tímann grunað.

Simon Cowell sveik sex ára gamla stúlku